ការកែច្នៃឡើងវិញកំពុងផ្លាស់ប្តូរឲ្យកាន់តែប្រសើរឡើង
ប្រព័ន្ធកែច្នៃឡើងវិញរបស់រដ្ឋវិចថូរៀកំពុងមានការផ្លាស់ប្តូរយ៉ាងធំធេង។ សេវាកម្ម និងរោងចក្រគាំពារការកែច្នៃឡើងវិញជាច្រើនកំពុងត្រូវបានដាក់ឲ្យដំណើរការនៅទូទាំងរដ្ឋ។ សេវាកម្មទាំងនេះនឹងជួយបញ្ឈប់ការចោលកាកសំណល់ចំនួន 80% ទៅទីលានចាក់សម្រាមត្រឹមឆ្នាំ 2030 និងស្តារឡើងវិញនូវវត្ថុកាន់តែច្រើនជាងមុនដើម្បីធ្វើផលិតផលថ្មីៗដូចជាសម្រាមរក្សាកុំឲ្យដីហួត ក្រឡកែវ និងផ្លូវថ្នល់។
ដូច្នេះសេវាកម្មកែច្នៃឡើងវិញនៅតំបន់មូលដ្ឋានរបស់អ្នក អាចនឹងផ្លាស់ប្តូរឆាប់ៗនេះ។ សាលាសង្កាត់មួយចំនួនបានដាក់ឲ្យអនុវត្តសេវាកម្មថ្មីៗរួចហើយ ខណៈពេលដែលសាលាសង្កាត់មួយចំនួនទៀតកំពុងរៀបចំផែនការផ្លាស់ប្តូរ។
ហេតុអ្វីបានជាយើងត្រូវការធុងថ្មីៗ
របៀបគ្រប់គ្រងកាកសំណល់ និងវត្ថុកែច្នៃឡើងវិញរបស់យើងតាមផ្ទះមានសារៈសំខាន់ណាស់ក្នុងការបង្កើតបរិស្ថានមួយប្រកបដោយសុខភាពល្អសម្រាប់សហគមន៍យើងរស់នៅ។
ការណែនាំឲ្យមានធុងវត្ថុកែច្នៃឡើងវិញ និងសេវាកម្មសម្រាប់កែវក្រឡ និងម្ហូបអាហារ និងកាកសំណល់សរីរាង្គសម្រាប់សួននៅទូទាំងរដ្ឋវិចថូរៀមានន័យថាការកែច្នៃវត្ថុកែច្នៃឡើងវិញកាន់តែស្អាត និងភាពកខ្វក់កាន់តែតិច។
ភាពកខ្វក់កើតមានឡើងនៅពេលកាកសំណល់ និងវត្ថុកែច្នៃឡើងវិញត្រូវបានដាក់ក្នុងធុងខុស។ ការធ្វើបែបនេះរារាំងមិនអាចឲ្យគេកែច្នៃឲ្យទៅជាផលិតផលថ្មីៗបាន។
ការញែកវត្ថុកែច្នៃឡើងវិញរបស់អ្នកបានត្រឹមត្រូវកាត់បន្ថយភាពកខ្វក់។ ការធ្វើបែបនេះនឹងមានឥទ្ធិពលវិជ្ជមានដល់បរិស្ថានរបស់យើង ខណៈពេលដែលកាកសំណល់កាន់តែតិចត្រូវបានចាក់ចោលនៅទីលានចាក់សម្រាម ហើយតម្រូវការសម្រាប់វត្ថុធាតុដើមថ្មី និងវត្ថុធាតុដើមត្រូវបានកាត់បន្ថយ។
សេវាកម្ម និងរោងចក្រកែច្នៃឡើងវិញថ្មី
ប៉ុន្មានឆ្នាំខាងមុខនេះសេវាកម្មធុងថ្មី និងកន្លែងទទួលយកវត្ថុកែច្នៃឡើងវិញនឹងត្រូវបានបើកដំណើរការសម្រាប់ការកែច្នៃកែវឡើងវិញនូវកែវក្រឡ និងកាកសំណល់ម្ហូបអាហារ ហើយនិងសរីរាង្គសួន (កាកសំណល់អាហារ និងកំទេចកំណាត់រុក្ខជាតិតាមសួនច្បារ)។
សេវាកម្មកាកសំណល់អាហារ និងសរីរាង្គសួនច្បារ
យើងអាចកាត់បន្ថយបរិមាណកាកសំណល់ដែលត្រូវចាក់ចោលនៅទីលានចាក់សម្រាមបាន 50% ដោយដាក់កាកសំណល់អាហារ និងកំទេចកំណាត់តាមសួនច្បារក្នុងធុងម្ហូបអាហារ និងសរីរាង្គពីសួនច្បារ។ សារធាតុសរីរាង្គទាំងនេះអាចកែច្នៃជាផលិតផលសួនច្បារមានតម្លៃដូចជាសម្រាមរក្សាកុំឲ្យដីហួត ឬជីកំប៉ុស្តដែលគេតែងតែប្រើសម្រាប់សួនសហគមន៍ ឬឧទ្យានក្នុងតំបន់។
កាកសំណល់អាហារដាក់ក្នុងធុងសម្រាមរបស់អ្នកនឹងបញ្ចប់នៅទីលានចាក់សម្រាមដោយបង្កើតជាឧស្ម័នផ្ទះកញ្ចក់កាន់តែច្រើន ដែលជាឧស្ម័នវិលវល់នៅក្នុងបរិយាកាសផែនដីដែលរក្សាកម្តៅ។ នេះប៉ះពាល់ដល់គុណភាពខ្យល់ សុខភាពសាធារណៈ និងការប្រែប្រួលអាកាសធាតុ។
សេវាកម្មកែច្នៃកែវក្រឡ
កែវក្រឡអាចត្រូវបានកែច្នៃឡើងវិញម្តងហើយម្តងទៀតពីព្រោះវាមិនបាត់បង់គុណភាពតាមរយៈដំណើរការកែច្នៃឡើងវិញឡើយ។ អំបែងកែវអាចមុតជាប់នឹងវត្ថុកែច្នៃឡើងវិញ ដូចជាក្រដាសក្រាសរឹង និងប្លាស្ទិចដែលធ្វើឲ្យមានការលំបាកក្នុងការកែច្នៃឡើងវិញ។
កែវក្រឡកាន់តែច្រើនអាចត្រូវបានកែច្នៃឡើងវិញជាក្រឡ និងកែវដោយគ្រាន់តែដាក់កែវក្រឡកែច្នៃប្រើប្រាស់ឡើងវិញរបស់អ្នកក្នុងធុងដាច់ដោយឡែកនៅតាមផ្ទះ ឬយកវាទៅកន្លែងទទួលយកវត្ថុកែច្នៃឡើងវិញ ឬស្ថានីយផ្ទេរប៉ុណ្ណោះ។ វាក៏កាត់បន្ថយភាពកខ្វក់នៅក្នុងធុងវត្ថុកែច្នៃឡើងវិញដែលដាក់ច្របូកច្របល់គ្នារបស់អ្នកផងដែរ ដោយធានាថាវត្ថុកែច្នៃឡើងវិញផ្សេងទៀតត្រូវបានស្តារឡើងវិញកាន់តែមានប្រសិទ្ធភាព។
រោងចក្រគាំពារការកែច្នៃឡើងវិញ
រដ្ឋាភិបាលរដ្ឋវិចថូរៀកំពុងនិយោគជិត 100លានដុល្លារលើហេដ្ឋារចនាសម្ព័ន្ធកែច្នៃឡើងវិញថ្មី ឬធ្វើឱ្យប្រសើរឡើង ដើម្បីកែច្នៃក្នុងតំបន់កាន់តែច្រើនជាងមុន។ ឧទាហរណ៍ ការវិនិយោគលើបច្ចេកវិទ្យាថ្មីអាចកែច្នៃ 40% នៃក្រដាស ឬក្រដាសក្រាសរឹងកែច្នៃឡើងវិញរបស់អ្នក ឲ្យក្លាយជាផលិតផលធ្វើពីក្រដាសថ្មី។
របៀបដែលការផ្លាស់ប្តូរនេះប៉ះពាល់ដល់អ្នក
សេវាកម្មកែច្នៃឡើងវិញនឹងខុសគ្នាពីសាលាសង្កាត់មួយទៅសាលាសង្កាត់មួយទៀត រហូតដល់ប្រព័ន្ធទូទាំងរដ្ឋត្រូវបានដាក់ឲ្យដំណើរការ។ នេះរួមមានទាំងសេវាកម្មផ្សេងៗដែលមានសម្រាប់អ្នក និងវត្ថុអ្វីដែលត្រូវដាក់ក្នុងធុងនីមួយៗ។ សូមមើលគេហទំព័រសាលាសង្កាត់ក្នុងតំបន់របស់អ្នកសម្រាប់ព័ត៌មានលម្អិតជាភាសាអង់គ្លេស។
ការដាក់វត្ថុកែច្នៃឡើងវិញបានត្រឹមត្រូវការពារមិនឲ្យធនធានដ៏មានតម្លៃធ្លាក់ទៅក្នុងទីលានចាក់សម្រាម ដូចនេះយើងអាចប្រើប្រាស់វាម្តងហើយម្តងទៀតបាន។
ការធ្វើបែបនេះហាក់បីដូចជាសកម្មភាពតូចតាច ប៉ុន្តែសកម្មភាពរបស់អ្នកអាចធ្វើឱ្យមានឥទ្ធិពលយ៉ាងធំធេងដល់អនាគតប្រកបដោយនិរន្តរភាពរបស់រដ្ឋវិចថូរៀ។
-
សេចក្តីផ្តើម
វីដេអូនេះត្រូវបានរៀបចំឡើងដើម្បីបង្ហាញពីរបៀបដែលកែវត្រូវបានកែច្នៃឡើងវិញនៅរដ្ឋវិកថូរៀ ហើយអាចប្រើដើម្បីផលិតរបស់ប្រើប្រាស់កាន់តែច្រើន។
សង្ខេបបែបរូបភាពៈ
វីដេអូនេះបង្ហាញពីវាគ្មិនមួយរូបនិយាយពីក្រុមហ៊ុន វីស៊ី (Visy) ដែលជាក្រុមហ៊ុនផលិតដបកែវ និងក្រឡកែវធំជាងគេបំផុតនៅប្រទេសអូស្ត្រាលី។
វាគ្មិននោះគឺ ៖
Chris De Fazio
ប្រធានគ្រប់គ្រងកិច្ចសន្យាក្រុមហ៊ុន វីស៊ី (Visy) - រដ្ឋាភិបាលក្នុងតំបន់
អត្ថបទ
[ការចាប់ផ្តេីមបង្ហាញផ្ទាំងរូបភាពជាមួយពាក្យនិយាយថាលោក Chris De Fazio ប្រធានគ្រប់គ្រងកិច្ចសន្យាក្រុមហ៊ុន វីស៊ី (Visy) - រដ្ឋាភិបាលក្នុងតំបន់]
[រូបភាពនៅក្នុងវីដេអូនេះគឺជារូបភាពទាំងឡាយដែលបង្ហាញពីការកែច្នៃឡើងវិញនូវដបកែវ និងក្រឡកែវនៅក្នុងរោងចក្រផលិត]
Chris De Fazio: ក្រុមហ៊ុន វីស៊ី (Visy) គឺជាក្រុមហ៊ុនផលិតដបកែវ និងក្រឡកែវធំជាងគេបំផុតនៅប្រទេសអូស្ត្រាលី ហើយត្រូវបានផលិតនៅទីក្រុងមែលប៊ិននេះតែម្តង។
កែវកែច្នៃប្រើប្រាស់ឡើងវិញតាមលំនៅដ្ឋានភាគច្រើនបំផុតត្រូវបានដឹកជញ្ជូនមកទីនេះដើម្បីផលិតជាដបកែវ និងក្រឡកែវឡើងវិញដោយប្រើប្រាស់វត្ថុធាតុដើមកែច្នៃឡើងវិញ។
សកម្មភាពតិចតួចដែលពលរដ្ឋវិកថូរៀអាចធ្វើបានដើម្បីជួយកែច្នៃកែវកាន់តែច្រើនគឺត្រូវដាក់វត្ថុកែច្នៃឡើងវិញនៅក្នុងធុងដោយមិនបាច់វេចខ្ចប់ក្នុងថង់។
សូម្បីតែសកម្មភាពតិចតួចបំផុតក៏អាចជះឥទ្ធិពលយ៉ាងធំធេងក្នុងការបង្កើតអនាគតមួយប្រកបដោយនិរន្តរភាព។
[បញ្ចប់ផ្ទាំងរូបភាពអមដោយអត្ថបទ "រដ្ឋវិកថូរៀប្រកបដោយនិរន្តរភាព" រដ្ឋាភិបាលរដ្ឋវិកថូរៀ ‘sustainability.vic.gov.au/Khmer-small-acts]
[ចុងបញ្ចប់នៃអត្ថបទ]